ढोबळी मिरची की भोंगी मिरची...

ढोबळी मिरची की भोंगी मिरची...

माझा आणी माझ्या बायकोचा एक वाद आहे. ढोबळया मिरचीला (Capsicum or Green Pepper) ढोबळी मिरची म्हणायचे की भोंगी मिरची! म्हणजे ती भोंगी मिरची म्हणते आणी मी ढोबळी!
कॊण बरोबर?

ढोबळया मिरचीचे गुणधर्म "ढोबळ" ह्या शब्दाने व्यक्त होतात की ते भोंगे आहेत?

ढोबळ म्हणजे ठोकळ, अनिश्चीत, विशीष्ट परीमाण नसलेले, गोळाबेरीज! आपण एखाद्या गोष्टीची 'ढोबळ' व्याख्या करतो! त्यामुळे ढोबळया मिरचीला ढोबळी मिरची म्हणायला हवे! कारण तीला काय आकार असतो हो? कोणत्याही शब्दाने व्यक्त न होणरया ह्या भाजीला ढोबळच म्हणायला नको का?

आता आपण भोंगी किंवा भोंगेपणाचा अर्थ पाहुया. भोंगा म्हणजे कर्णकटू आवाज करणारे वाद्य!आपल्या रिक्शाला जो लावलेला असतो भोंगा!तसे़च लेंगा किंवा नउवारी साडीच्या मांडी कडील फ़ुगीर भागाला भॊंगा म्हणतात! सगळे भोंगे फ़ुगीर असतात आणीक ढोबळी मिरची फ़ुगीर असते इतकेच काय ते साम्य! एवढ्या साठी ढोबळया मिरचीला भोंगी मिरची म्हणायचे? मग कांदा, तंबाटी (टोमाटो ),नवलकोल,बिट, ढेमसं ह्या सगळ्यांना भोंगा जोडावा लागेल!

माझा युक्तीवाद पटतोय ना मंडळी? तरी पण बायकोला काही पटले नाही. त्यामुळे आजकाल आम्ही एकाच भाजीला वेगवेगळ्या नावाने संबोधतो.

क्लीव्हलंडच्या भाजी बाजारात आम्ही बरयाच वेळेला भाजी आणायला जायचो. भाज्यांची मांडणी आणि रंग पाहून मी हरखुन जायचो.एकदा कॆमेरा घेउन गेलो होतो. फ़ोटोतील मुलगी "ढोबळ्या मिरच्या" विकत होती. तीला विचारले की, "भाज्यांचा फ़ोटो काढु का? "

ती म्हणाली की जर माझा काढणार असशील तरच भाज्यांचा फ़ोटो काढ!
भाज्यांच्या ढिगामागे लपलेल्या ह्या हसरया ललनेचा फ़ोटो माझ्या आवडत्या फ़ोटोंपैकी एक आहे.