शिकागो.......पृथ्वीतलावरचे एक अफ़ाट आणी सुंदर शहर!
तुमचा विश्वास बसणार नाही पण मला मी खुप मोठा होईपर्यंत अमेरीकेतील फ़क्त शिकागो हेच शहर माहीत होते. स्वामी विवेकानंदांच्या विश्वधर्म संमेलनामुळे..... २००२ साली जेंव्हा मी प्रथम इथे आलो होतो त्यावेळी स्वामीजींनी भाषण केलेलया जागी जायची इच्छा होती. पण कळाले की एका आगीत ते सगळं जळून गेले.

२००४ साली मी इकडे नोकरी साठी आलो आणी आता प्रेमात पडलोय! ह्या नगरीची अनेक लोभस रुपं आहेत. मरीन ड्राईव्हची आठवण करुन देणारा लेक शोअर ड्राईव्ह!उंची कपड्यालत्त्यांच्या दुकानांनी भरलेला मॆग्निफ़िशीयंट माईल! वळणावळणांनी जाणारी शिकागॊ नदी! वास्तूरचनेचा सुंदर नमूना म्हणता येतील अश्या अनेक इमारती असलेला उत्तर मिशिगन अव्हेन्यू, नेव्ही पिअर आणी
सर्वात महत्वाचे..मुंबईचा भेंडी बाजार, दिल्लीचा चांद्णी चौक, हैद्राबादचा चारमिनार आणी रमझानच्या काळातील पुणे कॆम्प ह्याची एकदम आठवण करून देणारा डेव्हान उर्फ़ म. गांधी मार्ग ! ह्या भागात फ़िरणे खुप नॊस्टाल्गीक असते. इथे बहुतेक सगळे उत्तर हिदुस्थानी, हैद्राबादी, पंजाबी, बंगाली, गुजराथी, पाकीस्तानी खाणे मिळते. मराठी पदार्थांची मात्र वानवा आहे
भारतीय जिनसा, किराणामाल, कपडे, दागदागीने, विड्याची पाने, हिंदी सिनेमाच्या कॆसेट, सिड्या, भारतीय न्हावी, क्वचीत शिंपी..... हा छोटा भारतीय उपखंड आहे. भारतीय उपखंड म्हणायचे कारण इथे पाकीस्तान्यांचे चांगलेच अस्तीत्व आहे. इकडे भारतीय स्वत:चा देसी असा उल्लेख करतात. पाकीस्तान्यांनी स्वत:ला त्यात समाविष्ट करुन घेतले आहे.

डेव्हान ला म. गांधी मार्ग असेही नाव आहे. त्यालाच पुढे जिन्नाह रोड असेही म्हणतात. एका गल्लीला शेख मुजीबूर रहमानचेही नाव आहे.

घरापासुन हजारो कोस दूर असूनही चार क्षण स्वदेशात असल्याचे सुख देणारा हा डेव्हान.......